基奧特A山輪住發威
阿仙奴最近連贏4場士氣勁好，今戰喺英聯盃造訪錫周三，梗係想延續勝仗！兵工廠近期作客3仗全勝之餘，對上兩場仲要大炒對手，一對箭頭基奧特、阿歷斯山齊士（A山）入波頻頻，就算錫周三幾好狀態都冇用，一於捧1.91倍嘅「讓客」！
（TVB302周三凌晨3:45直播）
兵工廠近期計埋盃賽連贏4場，當中對手仲有曼聯、拜仁慕尼黑兩大勁旅，認真叻仔。況且佢哋近期作客都唔曳，近兩場先後以5:2、3:0大勝李斯特城同屈福特，射手基奧特、阿歷斯山齊士入波頻頻，既然英聯盃已經去到16強階段，最近傳續約嘅教頭雲格落柯打希望隊波表現繼續有改善，相信一眾主將都有望正選披甲，務求盡快入多幾粒揮低對手，唔似會放棄呢個盃仔喎。
錫周三牌面輸蝕
另邊廂嘅錫周三，上輪喺英聯盃贏頹爆嘅紐卡素晉級，整體發揮流暢。更何況佢哋自9月中就冇輸過波，前鋒科里斯泰利近3仗亦入兩粒，成班波狀態係唔錯嘅，弊在今場對住弗到爆嘅兵工廠，實力、牌面始終有距離，睇怕個不敗紀錄都係咁先咯。
