另一場英聯盃16強上演越級挑戰戲碼，由英冠嘅「貓頭鷹」錫周三主場挑戰英超勁旅阿仙奴。「貓頭鷹」雖喺上圈曾爆冷淘汰英超紐卡素，但同「喜鵲」堅曳有關，今仗撞正連贏四場、連拜仁都砌低嘅阿仙奴，就算有地利都幫唔到幾多，直取讓球客勝。

（TVB 302周三凌晨3時45分直播）

錫周三喺英聯盃不時淘汰英超球隊，上季喺第2圈曾擊敗當時仍在英超角逐嘅般尼，但接着第3圈遇上實力強勁嘅「藍月亮」曼城即慘吞七蛋，證明以「貓頭鷹」嘅實力，要爆冷真係可一不可再。錫周三上圈能夠擊敗紐卡素，正值「喜鵲」聯賽三連敗嘅低潮期，今次對手換咗弗到漏油嘅阿仙奴，隨時重演上季噩夢。

法米尼擔正堅搶韁
阿仙奴唔單止實力甩開錫周三幾條街，佢哋已爬出早前歐聯兩連敗嘅谷底，豪取四連勝，包括擊敗曼聯、愛華頓同拜仁，其中於歐聯戰勝拜仁重燃出線希望，令士氣大振，加上近三場作客全勝，成班波可謂着晒火。

由於阿仙奴惡戰連場，主帥雲格今仗或會收起部分主力，反而畀到一班後備表演嘅機會，上圈佢哋喺北倫敦打吡淘汰死敵熱刺，就係起用法米尼、阿迪達、祖爾甘保、阿歷士張伯倫等副選應戰，一向守強攻弱嘅悍將法米尼，嗰場意外地包辦晒兩個入波，證明呢班球員難得擔正堅搶韁。兵工廠連場報捷信心爆棚，錫周三依家撞正佢哋整定冇運行，讓球客勝有買趁早。