曼市打吡鬥攻格
今晚係英超打吡之夜，頭場先有新特蘭對紐卡素嘅東北打吡，接着上演重頭戲曼徹斯特打吡，紅魔鬼曼聯主場迎戰藍月亮曼城。紅魔領隊尹戈爾上仗「大義滅親」，棄用荷蘭幫令成隊波生晒，今仗硬撼狀態同樣着火、近3仗攻入13球嘅藍月亮勢必上演入球騷，捧1.82倍大盤。

（now 621周日晚10時05分直播）

曼市打吡向來打甩髀，曼聯上仗作客3比0擊敗愛華頓後，目前只以兩分落後曼城，今仗只要贏波，喺積分榜上便可反壓對手，激烈程度可以預期。

尹戈爾變陣 激活鋒線
曼聯上仗之所以大勝，最主要原因係尹戈爾棄用狀態低沉嘅迪比，改用安達靴里拉喺中場派牌，然後將安東尼馬迪爾、桑馬達移往兩邊，由朗尼重任單箭頭，結果成功激活整條前鋒線，無論係兩邊側擊、走位配合都發揮超水準。兩名必然正選中場桑馬達同右閘達美安喺上場歐聯作客對中央陸軍都冇上陣，擺明留力搏呢場，現時紅魔上下信心爆棚，主場出擊定必會喪攻死敵。

曼城今仗續有阿古路、大衞施華兩大攻擊主力缺陣，但韋菲特邦尼、史達寧喺上場聯賽對般尼茅夫包辦5個入波助球隊大勝5比1，已證明有足夠實力補位，而且中場大腦奇雲迪布尼上場歐聯對西維爾又入靚波，狀態弗爆，仲有快翼捷西斯拿華斯打反擊，進攻點極多。

奧脫福互揪 連開7鋪大
睇番曼城對上7次作客奧脫福球場原來都有波入，單計近4次已經入咗13球，因此今仗絕對不愁冇波入。如以今仗中位數2.5球計，呢7次喺奧脫福上演嘅曼市打吡全部開大，目前大盤仲有1.82倍，值得入貨。