英超早場上演火爆東北打吡，由「黑貓」新特蘭主場硬撼死敵「喜鵲」紐卡素。新特蘭雖然排緊包尾，但打吡戰往往成為佢哋新帥嘅轉捩點，今仗亦係新帥「大Sam」艾拿戴斯首度於主場領軍，為護級梗係唔衰得喇，況且近5次交手贏晒擺明食住「喜鵲」，「大Sam」勢必藉贏打吡省靚塊招牌，平手盤斯維力撐「黑貓」。

（now 621周日晚8時直播）

艾拿戴斯上仗「首騷」雖不敵西布朗，但佢以擅教中型班見稱，過去成功帶領保頓、布力般流浪、韋斯咸於英超站穩陣腳，今次包尾嘅新特蘭搵佢救亡，絕對係明智之舉。

新帥效應 不利紐卡素
不過，勢估唔到「大Sam」首次主場領軍，就係面對曾炒佢魷魚嘅東北死敵紐卡素，梗係想新仇舊恨一招了，雖然紐卡素上輪靠韋拿杜姆食出「大四喜」狂勝諾域治6比2開齋，擺脫包尾位置明顯回勇，但東北打吡一向打甩髀，個個落到場都踢到飛沙劈石，鬥志高昂，不能單靠狀態而衡量兩軍嘅高低。

睇番之前幾季新特蘭易帥冇耐，咁蹺都迎來打吡戰，無論由迪肯尼奧、普耶、艾禾卡特帶隊，近5次碰頭「黑貓」豪取5連勝，贏波兼贏盡飛士，擺明食住紐卡素，並成為最終護級成功轉捩點，賽前隊長卡達莫大讚艾拿戴斯令眾將重拾比賽信心，球隊上下士氣大振。加上「喜鵲」仍有卡爾達路、史提芬泰萊、奧巴坦、路蘭度艾朗斯及利維亞尼等成籮傷兵，想贏亦有心無力，仲唔係「大Sam」樹立軍威、助未開齋嘅新特蘭爭取救命3分嘅好時機咩？平手盤一於捧「黑貓」。