阿仙奴呢排勁威水，可謂遇強愈強，先喺月初大炒曼聯3蛋，啱啱周中更喺歐聯以2比0擊敗長勝之師拜仁慕尼黑，今晚英超「兵工廠」主場迎戰「拖肥糖」愛華頓，呢粒「糖」仲唔實食冇黐牙？主勝得1.34倍太熱，捧1.8倍嘅半場主勝仲和味！

（now 621周日凌晨零時30分直播）

畀全球人類睇死嘅情況下，阿仙奴上仗歐聯主場對拜仁放棄控球，轉打穩守突擊戰術，結果成功搞到一地眼鏡碎，清脆擊敗號稱「宇宙最強」嘅拜仁。依家球隊上上下下士氣高昂，奧斯爾、阿歷斯山齊士、基奧特及禾確特呢班進攻球員腳風又順，今場對愛華頓又可以踢番佢哋擅長嘅小組滲入，今鋪火力全開下對住防守唔算硬淨嘅愛華頓，一班進攻好手又係開餐好時機。

愛華頓信心危機難偷雞
愛華頓今場有比錫、派拿、巴尼斯同希拔因傷缺陣，腳傷嘅中場湯卡華利亦要同時間競賽上陣成疑。「拖肥糖」對上兩次作客酋長球場分別輸0比2同1比4，擺明畀阿仙奴食住，兼且上場聯賽又畀曼聯大炒3蛋，終止7場不敗走勢，現階段實力、信心都同前列強隊有明顯距離，想偷雞難上加難，今場對住氣勢如虹嘅阿仙奴，半場都頂唔得住喇！