今晚有成23場歐霸分組賽賽事開售，焦點當然係利物浦新帥高普首次喺晏菲路球場帶領球隊出戰，喺B組面對俄羅斯球隊魯賓卡山。紅軍今場有史杜列治傷愈候命，賓迪基同羅拔圖法明奴亦有機會復出，有望解決紅軍攻力疲弱嘅問題，今場博大！

（now670周五凌晨3時05分直播）

高普上場英超首戰帶領陣容天殘地缺嘅利物浦作客打和熱刺0比0，外界普遍評價正面，球員肯拚肯搶，精神面貌大為改善，只係弊在前鋒傷剩奧歷治一個，呢位比利時20歲前鋒質素爭咁啲，經驗亦不足，今場無論係史杜列治定賓迪基傷愈打正選，威脅都肯定會大幾倍。今場更係高普首次喺晏菲路出戰，梗係想打響頭炮，對魯賓卡山一於全力搶攻爭勝！

熱刺啞火獻「細」
另一支英超代表熱刺就喺J組作客安德列治，熱刺有前鋒孫興民、中場查迪尼受傷缺陣，王牌射手哈利卡尼仍未重拾勇態，上場對利物浦有幾次入球良機都畀佢嘥晒，睇怕今場熱刺都唔慌多波入，捧細為妙。

（now670周五凌晨1時直播）