紅軍讓和冇「賓」波
 

今晚除咗係歐霸盃天下外，同時亦係利物浦新帥高普首次喺晏菲路球場亮相，主場領軍迎戰B組對手魯賓卡山。雖然呢位德國籍領隊係有料之人，但係佢執教時日尚短，加上前線缺人，就算贏1粒應該都會收貨，3.35倍「讓球和」抵玩。

（now670台周五凌晨3:05直播）

紅軍喺高普接手後演出有改善，但將帥之間點都要啲時間磨合，副隊長占士米拿亦講明：「高普盡力灌輸佢嘅戰術理念畀我哋，但冇可能即刻改變晒所有嘢。」何況紅軍鋒將賓迪基、羅拔圖法明奴等人打柴，高普又話會等射手史杜列治百分百好番先派佢落場，前線得番小將奧歷治攻堅，怕且都幾難數胡。

魯賓卡山作客少大敗
不過高普又唔係齋坐唔做，上仗打和熱刺0:0不但結束紅軍連續8場失守走勢，更成為今季首支對陣熱刺跑動比對方多嘅球隊，預期紅軍防守力會持續上升。至於對手魯賓卡山雖然近5仗作客輸4場，但當中3場敗仗都係僅輸1球，今仗未必咁易被大炒，「讓球和」不妨一試。