「迪哥」翻生 火力全開
車路士上仗英超主場淨贏阿士東維拉後，今晚重返歐聯戰場，作客烏超勁旅基輔戴拿模，梗係想再下一城啦！好在車仔依家冇乜傷兵，射手迪亞高哥斯達復出即入波，火力夠保證；至於傷兵滿營嘅基輔戴拿模，僅靠烏克蘭天才耶莫蘭高單天保至尊，一於博2.35倍客W。

（有線64、203周三凌晨2:45直播）

藍戰士依家喺英超竟然排下半版，講出嚟都冇人信。不過，佢哋季初表現低迷，好大原因係軍醫Eva嗰件事搞到滿城風雨，軍心大亂，所以先會衰到貼地。

夏薩特搏表現爭正選
仲有呀，領隊莫連奴批評部分戰將踢唔出水準，矛頭更直指今季狀態走下坡嘅後衞伊雲洛域、中場核心夏薩特。「寸王」仲警告夏薩特：「一係就落力啲踢、多啲回防，唔係就坐冷板。」講到咁狠，呢位比利時國腳仲唔畀心機咩？更何況佢哋只得守將伊雲洛域、門神泰拔高圖爾斯2件傷兵，幾乎夫添出擊，迪亞哥高斯達上輪聯賽復出即入波，睇怕想唔贏都幾難。

基輔靠耶莫蘭高擔大旗
車路士上輪小組賽意外輸畀波圖後，出線形勢被動，想晉級嘅話，嚟緊每場波都冇失分餘地。至於基輔戴拿模賽前收到個好消息，就係中場猛將耶莫蘭高最近同球會續約，士氣大振。弊在佢哋隊波傷兵多，上仗喺聯賽主場慘敗畀薩克達3粒，今場亦只係靠佢一個擔大旗，對住狀態有改善嘅車仔都係孤掌難鳴，車仔客W捧得過！