歐聯衞冕冠軍巴塞隆拿將喺E組作客白俄羅斯巴迪，呢場強弱懸殊大戰，冇理由唔揀「地上最強」啩？巴塞雖然有球王美斯同「小白」恩尼斯達繼續因傷缺陣，不過仲有尼馬同蘇亞雷斯壓陣，要炒巴迪冇難度呀！難得巴塞今場只係「-1」，仲有成1.7倍分頭，真係有買趁早呀！

（有線62及202台周三凌晨2時45分直播）

巴塞喺周日凌晨西甲大炒華歷簡奴5比2，尼馬一人獨取4粒，「阿蘇」都有1球進帳，向全世界證明「地上最強」唔係美斯一人球隊。「新比利」尼馬取得巴塞生涯首個大四喜，賽後仲向球隊同粉絲大派定心丸，承諾會同球會續約：「大家傾緊續約，我同巴塞仲有好多年約，巴塞球迷可以放心，我肯定會續約嘅。」尼馬依家一心一意為巴塞賣命，腳風又順，今場對巴迪等睇佢數胡喇！

巴迪兩鬥「地上最強」吞9蛋
唔驚巴塞入唔到波，係驚後面失波啫。巴塞連續8場都失波，主帥安歷基賽前下令班防守球員今場要醒醒定定，對住巴迪咪再失波：「我哋要再執下條防線，要贏冠軍，入波多之餘仲要減少失波。」巴塞今仗賽前有比利時守將華美倫復操，可以隨時候命，甚至有機會頂替失波失到冇晒信心嘅馬菲奧正選上陣。

巴迪上場歐聯喺主場對羅馬踢出代表作，贏3比2，但今場對手係級數再高幾班嘅「地上最強」，巴迪真係輸少當贏喇！巴迪曾喺11-12球季喺歐聯兩度對戰巴塞，一場就喺主場輸0比5，另一場就作客吞4蛋，兩場波一共失咗9球，依家嘅巴塞同當年擁有美斯、韋拿、柏度洛迪古斯嗰隊相比，實力不相伯仲，巴塞今場照炒可也，讓球客勝咪走寶！