史篤城門神歸位捉天鵝

今晚深夜嘅英超獨腳戲有「雙史大戰」睇，「天鵝」史雲斯主場迎戰史篤城。經過開季6場不勝後，史篤城最近兩場英超全勝，狀態回勇，面對聯賽4場不勝嘅史雲斯坐和望贏，「讓球主客和」捧受讓史篤城！

（now 621周二凌晨3時直播）

波斯尼亞籍門將比高域今夏過檔車路士後，或有人擔心史篤城後防不穩，但捱咗兩季做「阿二」後，英格蘭新晉門將畢蘭特即刻證明自己「My time is now！（依家就係我表演嘅時間）」。22歲嘅畢蘭特喺伯明翰時已備受注目，但喺13年加盟史篤城後就長期活喺比高域嘅陰影下，不斷被外借出去，雖表現出色，但都爭唔贏比高域。今季終於輪到畢蘭特擔正，佢亦不負眾望，踢咗8輪聯賽後，以37次撲救成為英超最多撲救嘅門將，連名宿希堅保咸都話，佢就快可以搶埋赫特首席門將之位。

史雲斯4戰不勝死晒火
有個咁堅嘅門將，史篤城近排又回勇，連埋英聯盃賽事連贏3場，士氣高昂。相反史雲斯經過8月超強表現後無以為繼，近4場不勝，陣中神射手巴菲迪比高美斯開季頭4場入完4粒後，跟住呢4場就唔見咗對射門鞋，另一射手阿休又有傷在身，今場即使落到場踢都唔夠弗喇！面對有門神畢蘭特把關嘅史篤城，好難贏囉，讓球客勝咪錯過呀！