庸帥麥卡倫玩殘喜鵲
紐卡素同新特蘭呢兩隊「東北兄弟」齊齊落難，踢咗8輪後都未開齋，「黑貓」換上新帥重新出發，相反「喜鵲」仲未肯郁「庸帥」麥卡倫。今晚紐卡素主場迎戰諾域治，客隊今季作客僅得一敗，讓球主客和有得受讓咪走雞！

（now 621周日晚11時直播）

「名帥」麥卡倫初初做過費格遜左右手，之後教過米杜士堡、英格蘭國家隊、川迪、諾定咸森林及打比郡等球隊，不過就愈教愈霉。佢教「三獅軍團」有幾衰就唔多講，教森林頭10場聯賽僅得8分搞到要引咎辭職；上兩季帶領英冠打比郡兩次「衝超」失敗。難怪當初紐卡素任命麥卡倫嗰陣，有「紐粉」灰爆話愛隊目標係向英冠進發喇！

「喜鵲」今夏用咗好多錢增兵，包括前鋒阿歷山大米祖域、中場韋拿杜姆同泰奧雲等，麥卡倫季前仲大口氣到話要帶領球隊爭入前8，真係唔得佢死！紐卡素踢咗8場得3和5負，僅得3分排喺榜尾。今仗賽前麥卡倫向現實低頭，放棄「保8」希望，話如果今季攞到40分，已經要開Party慶祝，真係未打就先輸氣勢。

紐卡素殘陣難贏
諾域治今季作客成績唔錯，當中4場客戰只係輸過畀修咸頓，「金絲雀」今仗傷兵唔算嚴重，只得中場穆林保未好番，同擁有門神告魯爾、奧巴坦、史提芬泰萊、路蘭度艾朗斯及利維亞尼等大批傷兵嘅紐卡素相比，可算陣容完整，熱捧1.52倍嘅「讓球客勝」！