競賽會聽朝喺阿甲主場對小保加，平手玩得過，因為小保加除咗有中場加高養傷，射手泰維斯冇糧出3個月後，據講嬲到打算走人，除咗祖雲達斯歡迎佢回歸，AC米蘭都好想搵佢幫手，可能會搞到小保加嘅軍心散晒。

（開賽時間：周一上午8:30）

競賽會有機可乘
冇錯！小保加係爭緊聯賽冠軍，但既然泰維斯都冇糧出，相信陣中其他球員都唔會好過，令人擔心佢哋近排嘅強勢會結束。事實上，最近泰維斯都幾黑仔，最近難得有機會為阿根廷國家隊正選上陣，都會唔好彩到畀對手起肘撞爆鼻樑，佢啲黑氣隨時會累埋小保加輸波，撐競賽會好過。