德乙榜首球隊波琴主場迎戰RB萊比錫值得留意，波琴早前一度失準，連續四場聯賽失分，賠率逐漸退熱，但上仗大勝格雷特霍夫五蛋，信心已經返晒嚟，遇上防線不穩嘅RB萊比錫，平手盤捧波琴有着數。
（周日晚7時30分開賽）
泰路迪腳風順
波琴開季首五輪聯賽全勝，但之後突然走樣，四仗僅三和一負，當中三仗係領先下被逼和，球員谷埋一肚氣，上仗終於大爆發，狂數格雷特霍夫5比0，前鋒泰路迪重拾射手鞋，個人梅開二度，佢今季已轟入八球，可以話係對手守將嘅噩夢。兩位中場巴斯迪安斯、杜比亞斯韋斯、後衞施梅歷已傷愈，人腳更加齊整。波琴已經重回正軌，以佢哋嘅人腳實力，值得長追。
RB萊比錫雖然上仗3比2擊敗紐倫堡，但要留意該仗開波六分鐘對手已有一人被逐，萊比錫絕大部分時間人多打人少仍然失兩球，贏得欠缺說服力。事實上，萊比錫最大弱點係防守差，早前對下游球隊1860慕尼黑被逼和2比2，因此萊比錫今仗對住回勇嘅「一哥」波琴，恐怕後防有難。
