莫斯科打吡少有駁火
今晚俄超上演莫斯科打吡，由莫斯科斯巴達主場硬撼莫斯科火車頭。雖然「二哥」火車頭今季表現突出，但周中有歐霸後顧，今仗或會有所保留，而且打吡戰大家都唔想輸波失威，難免會踢得保守啲，以往五次交手四度開入球細，看來今仗唔慌多波入，細盤乃不二之選。

（有線64及203台周日晚6時30分直播）

俄超今季有四支莫斯科球隊，因此莫斯科打吡隨時有得睇，好似異軍突起殺上次席嘅火車頭，開季後已經踢咗兩場打吡，分別同莫斯科中央陸軍及莫斯科戴拿模打成1比1，和氣收場。始終係同市打吡戰面子攸關，就算贏唔到都唔想輸波咁失威，踢得保守在所難免，而且火車頭希望喺歐洲賽有所作為，適逢下周中歐霸主場迎戰土超勁旅比錫達斯，有後顧之憂下，今仗作客斯巴達相信唔會去盡。好彩隊火車頭長哥魯卡刑滿復出，有呢位克羅地亞國腳後衞助陣，對鞏固防線幫助極大。

斯巴達折箭冇乜火
相反，斯巴達前鋒薛路爾斯因足踝受傷仍要倦勤，對攻力構成一定影響，從近五仗聯賽僅入五球可見一斑，斯巴達就算想攻都恐怕有心無力。睇番雙方之前五次喺聯賽碰頭，三度打和之餘，更有四次開出入球細，證明打吡戰大家都小心翼翼，防守大過天，預計今仗隨時處於膠着狀態，入波唔會多，細盤有1.65倍咪嫌少。