另一場意甲重頭戲拿玻里主場對費倫天拿，兩軍近期都弗爆，拿玻里連接擊敗兩大豪門祖雲達斯及AC米蘭，氣勢一時無兩。至於費倫天拿連歐霸盃取得5連勝，相隔16年再穩坐榜首之位，同樣銳不可當。今場龍爭虎鬥屬五五波，費倫天拿受讓半一，肯定比較着數，最好捧下盤。
（TVB 301周日晚9時直播）
拿玻里近兩場意甲擊敗祖雲達斯及AC米蘭，表現最出色嘅球員肯定係翼鋒恩斯治尼，佢喺呢兩仗獨取3球。不過，呢位「小巨人」早前跟隨意大利國家隊集訓期間受傷，雖然傷勢唔算嚴重，但難免令人擔心會影響佢發揮，成為拿玻里一大隱憂，仲要讓到半一，未免太過火。
少帥保羅蘇沙有料到
費倫天拿繼大炒國米4比1之後，上仗又贈阿特蘭大3蛋，加上歐霸盃贏比蘭倫斯4比0，近3仗共轟入11球，攻力強勁，證明新教練保羅蘇沙的確有料到。事實上，呢位45歲葡萄牙少帥球員時代曾喺意甲打滾多年，效力過祖雲達斯及國際米蘭，足球思維上盡得意甲勁旅精髓，難怪令費倫今季都具備爭標實力，作客拿玻里要保不敗，應該唔難。
