國米大盤趁祖買
意甲上演「國家打吡」，國際米蘭主場惡鬥祖雲達斯。國米今季復甦重返爭標行列，即使近期陷入小低潮，好在射手祖維迪趕及傷愈，預料攻力會有改善。祖雲達斯亦已擺脫頹勢，係時候急起直追收復失地，祖記過去4次作客國米，取得3勝1和優勢，無懼同主隊駁火，一於博2.19倍入球大。
（TVB 301周一凌晨2時45分直播）
國米聯賽開季首5戰全勝係威係勢，但近兩場卻只有1和1負，全因首席射手祖維迪受傷缺陣。好彩國際賽檔期畀呢位黑山國腳有得休息，佢亦已經傷愈可隨時候命。另一新加盟嘅翼鋒比列錫亦逐漸融入球隊，上仗聯賽開齋，配合上季意甲神射手得主之嘅莫路伊卡迪，國米「三叉戟」齊腳出擊，威力非同小可，勢必對祖記防線構成重大壓力。
祖記追數實搏拳
祖雲達斯亦收到好消息，早前「為國捐軀」嘅射手艾華路莫拉達及中場保羅普巴，並冇大礙已經復操。中場馬治斯奧亦都傷愈，中前場人腳鼎盛，即使文迪蘇傑繼續養傷，對攻力亦影響不大。事實上祖記近兩場比賽贏得精彩，分別歐聯贈西維爾兩蛋，上仗意甲以3比1輕取博洛尼亞，連防中基迪拉都有波入，整體戰出色。祖記季初失咗唔少分，依家趁回勇必全力搶分，更何況今仗鬥國米屬於爭標「6分波」，必定趁近期個勢好搶攻，形勢上有利開大。
