今日晏晝有兩場澳職賽事，頭場布里斯班獅吼主場對中岸水手，上季僅排第6嘅獅吼今季有個好開始，全靠新兵占美麥卡倫發威梅開二度，揭幕戰作客贏西悉尼流浪者3比1。中岸水手雖然開咧戰都贏波而回，但球隊過去3次對獅吼全敗，唔捧獅吼1.63倍主勝就走寶喇！

（周日下午2時開賽）

布里斯班獅吼陣中傷兵一大籮，前鋒軒歷基安達迪、守將迪維利及史堤芬魯圖今場皆因傷缺陣，而射手桑蘇拿辛奴同後衞占士當拿治亦上陣成疑。不過正如同樣面對傷兵問題嚴重嘅利物浦新帥高普所講，去諗一啲上唔到陣嘅球員係不切實際，最緊要睇吓球隊仲有咩人啱用。

獅吼季前就入啱貨，喺珀斯光輝簽入占美麥卡倫，亦免費簽入西班牙進攻中場哥朗拿，兩個都喺上場表現Sharp醒，幫獅吼輕鬆全取3分。呢對進攻拍檔咁快就擦出火花，夾多排威力真係不容忽視！

中岸水手上仗主場險勝珀斯光輝3比2，球隊好大喜「攻」一共有24次射門，不過識攻唔識守，後防勁多空位，今場又有守將普斯高尼路繼續抖，加上對上3次對住獅吼都輸，擺明患有「恐獅症」，今場主勝同入球大都捧得過。

光輝撼鳳凰唔慌多波入
接住就有珀斯光輝主場鬥威靈頓鳳凰，兩軍都喺首戰輸波，其中鳳凰輸畀紐卡素噴射機1比2，無論控球率定射門次數都好過對方，但衰在把握力曳。珀斯光輝上場失夠3粒，今場相信以穩行先，細盤有2倍可以一試。

（周日下午4時開賽）