曼聯今晚作客鬥愛華頓，紅魔鬼今季作客表現欠穩，連盃賽在內對上4場作客輸咗3場，而且近3季作客葛迪遜公園球場全部輸晒兼冇波入，今場啃唔落呢粒拖肥糖，咁嘅往績曼聯仲要讓波並唔合理，必捧讓球主勝。
（now 621周六晚10時直播）
對上3季作客全敗
曼聯除咗季初作客贏過擊敗實力一般嘅阿士東維拉同布魯日，對上4場作客有3場敗陣而回，其中對史雲斯、燕豪芬更加係先勝後敗，似乎防線唔夠穩定性去保住領先戰果，上輪作客阿仙奴喺開波頭19分鐘內連失3球，更反映球員集中力不足。愛華頓連盃賽在內已保持7場不敗，而且球隊最近3場都係先落後情況下追和或反勝對手，顯示佢哋應付逆境波韌力十足。
曼聯隊長朗尼因傷缺席對上兩輪國際賽，據報今仗可以復出，不過佢今季表現跌Watt，而且對上一次倒戈作客入波已經要數番到07年咁耐，重返葛迪遜公園球場似乎唔多旺佢。
此外，紅魔兩位荷蘭主力迪比、戴利白蘭周中喺歐國外代表荷蘭搏得好盡，雖然愛華頓嘅巴克里、菲臘積基爾卡、賴史密夫都有為國服役，但踢嘅只係例行公事，論體力主隊亦勝一仗。睇番曼聯對上3季英超作客愛華頓全敗兼未能取得入球，今次再訪凶地竟然要讓波，咁當然要捧讓球主勝。
