首戰同失利 搶分更飢渴
今日澳職獨腳戲由阿德萊德聯主場對西悉尼流浪者，呢場波可以話係「西班牙打吡」，皆因雙方都以西班牙球員為骨幹，「阿聯」更由巴塞名宿阿摩執教。球場上對決鄉里都冇面畀，尤其係兩隊同樣於首周失分，爭勝飢渴感更強，大家都想打開勝利之門。球迷坐山觀虎鬥，最好捧入球大。

（有線64及203台周五下午4時40分直播）

今季澳職總共有11位西班牙球員，屬於各國外援之冠，阿德萊德聯同西悉尼流浪者各佔3人，成為最具「鬥牛」風格嘅球隊。事實上，阿德萊德聯兩年前由前傑志教練甘巴爾領軍後，已推行西班牙進攻踢法，阿摩身為巴塞名宿，接手執教「阿聯」，順理成章繼續主攻。「阿聯」揭幕戰同墨爾本勝利互交白卷，皆因對手係上季常規賽同季後賽雙料冠軍，「阿聯」遇到頑強抵抗，入唔到波情有可原，今仗主場遇上實力較遜嘅西悉尼流浪者，入波機會大增。

兩軍「西化」崇尚進攻
西悉尼流浪者上季常規賽僅得尾二，會方痛定思痛，今季一次過羅致4位歐洲外援，包括3位西班牙中場迪馬斯迪加度、安特里奧及艾拔圖阿古拿，前兩者曾效力巴塞隆拿B隊，個人技術不俗，可見流浪者希望「西化」自強。另一來自意大利嘅新兵比奧華卡利，曾效力國際米蘭及森多利亞，加上原有前荷蘭國腳卡斯迪倫，流浪者中前場可謂人才濟濟。流浪者上仗1比3不敵布里斯班獅吼，4個入球都係上半場出現，擺明踢法有前冇後，捧大啱數。