今晚英冠獨腳戲布里斯托城主場鬥諾定咸森林，布城今季升上英冠後成績曳爆，依家排緊包尾，今季主場又未開齋，咁嘅表現仲要讓森林真係有冇搞錯？森林受讓平半有1.98倍，下盤有買趁早。

（TVB 301周六凌晨2時45分直播）

布里斯托城趁國際賽空檔從雷丁及諾域治借入前鋒西蒙確斯同進攻中場艾利洛賓納特，只係呢兩位絕非甚麼好貨色，而且初嚟甫到，建立默契需時，靠佢哋做救世主真係死得。事實上布城10輪聯賽僅得1勝，今晚主場對森林搶到1分都已經好滿足。

森林作客靠得住
諾定咸森林今場有中堅馬菲米斯坐波監，但有奇雲威爾遜可頂佢個位，問題不大。其實森林今季嘅作客成績好過主場多多聲，喺英冠主場3連敗，但近4仗客戰則錄得2勝2和不敗佳績，今場對住包尾嘅布城隨時反客為主，贏埋都唔奇，有得受讓平半，呢個下盤咪錯過。