南美雙雄巴西及阿根廷同病相憐，缺少兩位巨星尼馬同美斯之下，上周首輪世界盃外圍賽一齊輸波，認真失威。兩軍明早外圍賽再次分途出擊，巴西比較「幸運」，返回主場對弱隊委內瑞拉，相信可以把握機會爭取大勝，省番靚金漆招牌，直取讓球主勝。

（周三早上9時開賽，馬會網上文字直播）

尼馬續停賽 主場要交代
巴西靈魂人物尼馬停賽之下，上仗作客吞智利兩蛋，並唔出奇，畢竟對方係應屆美洲國家盃冠軍。尼馬今仗繼續坐波監，但對手換上世界排名69位嘅委內瑞拉，加上有地利，相信會易踢好多，領隊鄧加亦應會採用比較進取戰術，打出漂亮勝仗，否則好難向主場同胞交代。

雖然「森巴兵團」少咗尼馬，但中前場仍有不少猛將，包括拜仁慕尼黑左翼杜格拉斯哥斯達、車路士孖寶韋利安、奧斯卡杜斯山度士，奧蘭多城球星卡卡，要撕開委內瑞拉防線，仍綽綽有餘。其中韋利安今季頻入靚罰球，委內瑞拉實力差一截，估計會經常以犯規阻止巴西推進，韋利安應有表演機會。

委內瑞拉客戰森巴例捧蛋
委內瑞拉最有名氣球員只係西布朗前鋒荷西朗頓，以及熱拿亞中場湯馬士連干，日前主場都以0比1輸畀巴拉圭，去到巴西情況肯定更惡劣。事實上，委內瑞拉近6次作客巴西，只有1和5負，未入過波，其中5場敗仗都淨輸3球或以上，今趟捧蛋居多。