真係好衰唔衰，衰埋一堆，繼美斯、阿古路養傷之後，阿根廷又有碧基亞、加雷兩件中後場球員摺埋，今日佢哋响世界盃南美洲區外圍賽作客對巴拉圭，少咗近半主力，爭勝難度好大，除咗個1.59倍入球細係投注首選，1.95倍半場和都值得一試。

（開賽時間：周三早上8:00）

阿根廷呢期真係黑過墨斗，美斯、阿古路兩件攻擊主力打柴，本來已經等於讓半臂，點知呢兩日練波，中場碧基亞、守衞加雷又排住隊賴嘢，搞到主帥馬天尼冇晒計，臨急Call咗愛華頓件後衞拉美路富尼斯摩利返嚟頂檔，但係一直都有消息話，衞將馬高斯盧祖、中場羅拔圖佩雷拉都有些少傷，阿根廷固然要變陣，不過點變法都係個好頭痛嘅問題。

少近半主力鬥巴拉圭
據阿根廷傳媒畀料，同上場客戰0:1輸畀委內瑞拉場波相比，阿根廷今仗至少會有5個調動，有些少背傷嘅泰維斯，可能同迪馬利亞合演雙箭頭，但係馬天尼似乎仲有啲十五十六，事關球迷覺得保羅戴巴拿拍泰維斯好啲，令佢承受一定嘅輿論壓力，唯一肯定係卡尼維達會頂替碧基亞踢中場，薩巴列達、拿華斯兩個都好大機會踢正選。

陣容變動咁大，你話阿根廷可以同以往一樣，作客巴拉圭保持到近年67%以上勝率，恐怕冇乜人信。而且巴拉圭隊長保羅達施華都話，少減幾件主將嘅阿根廷，依然爛船仲有三斤釘，所以主隊嘅心態，仲係當對手夫添咁打，阿根廷想贏真係唔易，前45分鐘冇交收都唔出奇。