韋利安：贏委內瑞拉1:0係理想賽果
世界盃南美洲區外圍賽嚟到第2輪賽事，首戰作客吞咗智利2隻光蛋嘅巴西，呢鋪回師主場迎戰同樣輸波嘅委內瑞拉，理應要大炒一場氹番球迷嘅。之不過呢支「森巴兵團」鋒力不再，加上大批球星缺陣，難怪佢哋話贏一粒都收貨，怕且都冇乜機會做大騷，捧1.95倍入球細好過！

（開賽時間：周三早上9:00）

曾幾何時，巴西從來唔驚冇好前鋒用，士哥對佢哋嚟講真係易過食生菜。點估到「足球王國」近年青黃不接，前線得番尼馬一個夠卡士，可惜「新比利」停賽，焗住由侯克再次擔正。只不過呢位「變形俠醫」踢嚟踢去都係喺葡超、俄超等二流聯賽打滾，實力不宜過分高估，隊友韋利安同奧斯卡杜斯山度士，近年踢到變咗工兵咁，快翼杜格拉斯哥斯達又未夠經驗擔大旗，真係想搵個可靠啲嘅士哥拿都難！

侯克冇料 雷斯打柴
禍不單行嘅係，中堅大衞雷斯上場勇戰受傷今仗倦勤，加埋鋒將羅拔圖法明奴、中場菲臘比古天奴、鐵衞堤亞高施華等人缺陣，「森巴兵團」無論攻守都降咗成個Grade，難怪連自己友都唔睇好。韋利安賽前索性叫球迷接受現實，唔好對戰果有太多期望：「巴西可以輕鬆打敗委內瑞拉嘅日子已經唔存在喇，對方勁咗咁多，呢鋪贏到1:0已經係理想賽果。」連正選球員都失晒信心，大家就知應該點揀啦！

巴西走下坡嘅同時，委內瑞拉就發奮自強，雖然呢支南美弱旅鬥巴西往績勁羞家，22戰夾埋贏得1鋪，但係佢哋近年愈嚟愈難啃落肚。近3仗對巴西2次成功悶和0:0，再唔係昔日被對手話數就數嘅對象。何況佢哋上仗主場以0:1輸畀巴拉圭失分，呢鋪為咗搶分真係唔介意泊足90分鐘大巴，以家陣巴西嘅火力想玩大屠殺，咪玩啦！