歐國外分組賽最後一輪，H組上演意大利主場對挪威嘅榜首大戰。「藍衫軍」意大利提早出線，今場難免放軟手腳，實力較弱嘅挪威贏波亦肯定進身決賽周，何況呢隊波鋒力麻麻，作客料踢穩守突擊，相信今場入波唔慌多，1.57倍「入球細」抵博。

（有線64、203及中央5台周三凌晨2:45直播）

「藍衫軍」兩件中場休戰
意大利上場贏阿塞拜疆出線，但睇番成個分組賽霸氣欠奉，4場主場賽事只係入得5球，對住弱旅保加利亞、馬爾他都係僅贏1:0。既然隊波出咗線，今場睇怕連爭勝動力都冇埋，更何況中場迪羅斯停賽，派路掛免戰牌，創造力大打折扣，想入波都唔容易。

另邊廂嘅挪威上仗主場2:0擊敗馬爾他，今場贏波亦可進身決賽周，弊在佢哋入波能力一樣唔掂，外圍賽近3場作客有2場開細，分別小勝1:0。事實上，佢哋近8次對賽有7次都開入球細，絕對值得再追。