歐國外今晚有場好波，荷蘭喺主場同篤定出線嘅捷克上演「生死戰」。依家喺A組排第4嘅荷蘭仲想踢附加賽嘅話，今場除咗要贏，仲要望土耳其輸波，想逃出生天就要靠隊長史奈達喺中場派牌，射手亨特拉爾、迪比生生性性數胡。更何況捷克出咗線，近5次作客荷蘭都未贏過，2.12倍「讓主」好路！

（有線61、201周三凌晨2:45直播）

「橙衣軍團」搞到今時今日咁，都係自己唔爭氣。一向被譽為「外圍賽之王」嘅佢哋，喺今屆外圍賽表現不堪入目，早前先後輸畀冰島、土耳其，令到隊波陷入出局邊緣。好在佢哋上場作客2:1險勝弱旅哈薩克，保住出線一絲希望。

門神告魯爾膝傷嚴重
呢支「A組阿4」落後「3哥」土耳其2分，今戰對捷克非勝不可之餘，仲要望土耳其主場輸畀冰島！對手1分都夠出線，想進身決賽周，惟有盡地一煲博一鋪。荷蘭今場有雲達韋爾坐完波監，會擔正右閘，弊在門神告魯爾膝蓋受傷，檢查後證實十字韌帶重創提早收咧，由華美亞頂佢個位。好彩嘅係，「橙軍」條鋒線撻着，上仗亨特拉爾仲助攻畀史奈達入波，火力夠保證。

捷克篤定出線
至於捷克冇傷停問題。不過佢哋已經出咗線，今場未必會夫添出擊，冒住受傷危險同荷蘭踩到盡。更何況呢班波對上5次作客荷蘭都冇贏過，連數據都唔幫佢哋，1.37倍主勝太熱冇乜分頭，博吓「讓主」仲好！