歐國盃外圍賽H組，意大利主場對挪威，意大利上仗贏波後，已獲得出線權，冇必要去盡，最微妙地方係意大利若然輸畀挪威，就可令「剋星」克羅地亞無法直接出線，被迫轉戰附加賽，增加出局風險。意大利為「長遠利益」，隨時送個順水人情畀挪威，一於博客勝。

（有線64及203台周三凌晨2時45分直播）

挪威領先第3位克羅地亞2分，但對賽成績較差，換言之今仗必須全取3分至肯定出線，慶幸對手意大利已穩奪出線資格，可能放軟手腳，令挪威贏波機會大增。事實上，意大利領隊干地正好趁今場無關痛癢嘅比賽試陣，考察基奧雲高、羅拔圖蘇利安奴、邦拿雲度拉等邊緣國腳嘅表現，甚至收起近年頻受傷患困擾嘅鋼門保方，亦唔出奇。

值得一提，意大利輸波亦幫到自己，因為「剋星」克羅地亞屆時只能轉戰附加賽，意大利史上8次對克羅地亞從未贏過，只有5和3負，如果克羅地亞踢附加賽出局，意大利喺決賽周就可減少一個大患，今場有可能「放水」畀挪威。

格仔兵團馬爾他捱「細」界
挪威近年踏入收成期，有唔少90後高質素球員冒起，包括皇馬「神童」馬田奧迪加特、般尼茅夫前鋒祖舒亞京治、慕遜加柏後衞洛特維迪，初生之犢不畏虎，對住意大利，照贏可也。

同時間開波嘅克羅地亞作客馬爾他，「格仔兵團」爭直接出線形勢被動，加上射手文迪蘇傑受傷冇入選，難炒馬爾他，更何況同分先計對賽成績，克羅地亞有優勢，亦冇必要大炒馬爾他，寧願揀細盤。