一齊夾死荷蘭 土耳其冰島和味
歐國外今晚嚟到最後一輪，咪以為好多球隊已經出線就冇晒睇頭，反而充斥一片陰謀論，A組身陷險境嘅荷蘭，隨時畀冰島同土耳其夾計打「默契和波」踢出局，H組已晉級嘅意大利會否「放水」畀挪威，令「剋星」克羅地亞冇得直入決賽周呢？呢啲波有冇蠱惑，都好引人入勝！

A組土耳其主場迎戰冰島，已出線嘅冰島只要唔贏，不但「幫到」土耳其穩奪第3嘅附加賽資格，更直接將同組傳統勁旅荷蘭送上「斷頭台」，土耳其近年對賽輸蝕唔敢冒進，既然打和各有着數，不妨直取和波。

（有線62及202台周三凌晨2時45分直播）

講到A組，大家焦點都會落喺上年世盃季軍荷蘭能否死裏逃生，由於冰島同捷克已攞咗頭兩名直接出線資格，剩番第3嘅附加賽席位，依家荷蘭落後「3哥」土耳其2分，對賽成績亦較差，即係話「橙衣兵團」除咗要喺今仗贏捷克，仲要冰島幫佢哋「打江山」擊敗土耳其，先至取得參加附加賽嘅續命機會。相反，土耳其只要打和就得第3，荷蘭贏100球都冇用，形勢極之被動。

人不為己天誅地滅，畀着你係冰島，寧願喺決賽周撞到土耳其抑或荷蘭呢？梗係土耳其喇！捷克上仗對土軍就做咗個最佳「示範」，首先收起首席鋼門施治，雖然一度「交足戲」撳住嚟攻，但當佢哋下半場中段失咗球12碼後，即刻冇晒鬥心，臨尾輸多粒亦變得合情合理。何況冰島今仗只要唔贏便達到目的，連歐國盃常客捷克都有辦你睇，對於呢支大賽「新丁」嚟講，同土耳其踢場「默契和波」踢走荷蘭，少個大敵利己利人，點計都有着數。

橙軍 捷克 做「大」騷
睇番冰島近兩仗歐國外，主場對呢組包尾嘅哈薩克及尾二嘅拉脫維亞都打和，有齊「狀態跌Watt」嘅理由。雖然土耳其喺隊長阿達杜倫同查漢奴古帶領下，連贏荷蘭及捷克弗到漏油，但形勢上今仗唔輸就搞掂，之前8次對住冰島，竟錄得1勝2和5負嘅劣績，「老江湖」主帥泰林慎防有乜閃失，難免會踢得保守啲，若果落到場Feel到冰島Hea踢，土耳其隨時拖慢節奏加以「配合」，整場「默契和波」唔奇，和波有3.45倍非常值博。

同時間進行嘅荷蘭主場對捷克，前者上仗小勝哈薩克一粒，表現認真麻麻，完場前先換入前鋒尹佩斯，擺明留力踢呢場生死戰，當然冇得諗咁多必搏盡搶攻求勝，但假若「冰土戰」一直處於膠着，都會影響「橙軍」嘅比賽情緒，觀乎佢哋上仗都畀哈薩克破到蛋，門將告魯爾、施利臣同後防真馬特一齊受傷，告魯爾更因膝頭十字韌帶受傷而提早收咧，令防線存隱憂，已出線嘅捷克冇晒心理包袱隨時鬥攻，轉玩入球大好過。

（有線61及201台周三凌晨2時45分直播）