另一支落筆打三更嘅南美班霸阿根廷，聽朝將要作客硬撼巴拉圭。「潘帕斯雄鷹」唔單止冇球王美斯，連弗到爆嘅前鋒阿古路都打柴，面對擺明玩「龜縮」嘅巴拉圭，阿根廷隨時冇碇埋手，一於捧巴拉圭讓球勝。

（周三早上8時開賽，馬會網上文字直播）

美斯缺陣雄鷹頭痕
美斯因傷要抖兩個月，令「潘帕斯雄鷹」群龍無首，就算陣中仍有阿古路、泰維斯、拿維斯等前鋒，踢落猶如各自為戰。阿根廷上仗不但慘吞厄瓜多爾兩蛋，連弗到漏油嘅阿古路都因傷退下火線，今仗肯定缺陣，阿軍後備席上無論係「老油條」泰維斯及拿維斯，抑或嫩到爆嘅兩名「新阿古路」保羅戴巴拿同安祖哥利亞，冇個靠得住，中場碧基亞、羅拔圖佩雷拉同後衞馬高斯盧祖傷晒，連中堅加雷都因為老婆分娩而臨時退隊，搞到主帥馬天奴頭都痕埋。

今年美洲盃4強阿根廷曾狂數巴拉圭六個一皮，有入波嘅迪馬利亞同柏斯托尼仍在陣中，不過嗰場踢到出神入化嘅，係獻上助攻帽子戲法嘅美斯，今場冇咗佢做策應，連阿古路都打柴，阿根廷進攻威力大打折扣。

巴拉圭由前阿根廷射手雷蒙戴亞斯執教，佢哋向來鍾意玩「龜縮」，上仗險勝實力平平嘅委內瑞拉都唔敢冒進，何況係對住勁旅阿根廷呢？加上近4次主場對「潘帕斯雄鷹」僅1敗，今仗有力頂住唔輸，仲有得受讓咪走寶。