歐國盃外圍賽Ｄ組分組賽煞科戰，榜首德國於萊比錫主場迎戰格魯吉亞，德國上周五凌晨作客不敵愛爾蘭未能提早出線，賽果令領隊勒夫及國內球壇十分緊張，勒夫更將原定上周五的假期取消，所有球員集中備戰，更已下「格殺令」，當格魯吉亞「老虎」嚟打，小勝都唔收貨。由於兩軍實力差距明顯，已篤定出局嘅格魯吉亞好難喺德軍地頭做攔路虎，讓球主客和德國讓兩球，1.63倍讓球主勝可作過關重心。

（有線62及202台周一凌晨2時45分直播）

主場盡數挽回面子
德國上輪作客都柏林爆冷以0比1不敵愛爾蘭，目前只領先波蘭1分咁大把，假如今仗輸波就有可能跌落第3位踢附加賽，經過呢場失利後，德國傳媒立即向國家隊發出警號，提醒球隊喺2001年6月嘅02世盃外圍賽分組賽最後一役，主場畀弱旅芬蘭摸和，最終要透過附加賽兩戰烏克蘭先至驚險贏得決賽周資格，勒夫當然唔敢掉以輕心。

德軍對愛爾蘭一役有馬里奧葛斯於早段傷出，賽後證實內收肌肌腱撕裂，預期要養傷3個月，今仗肯定無緣披甲，另中場大將舒韋恩史迪加亦有輕傷上陣成疑，球隊上仗遭愛爾蘭瘋狂搶逼確遇到一定困難，不過奧斯爾同湯馬士梅拿腳風唔順接連失機亦係關鍵所在，今晚返到主場出擊唔敢再歎慢板，除上述兩人加上馬高列奧斯外，預期禾蘭、比拿拉比甚至麥斯古斯等攻擊手都會得到上陣機會，除爭出線外亦要盡情數胡，藉以挽回面子。

格魯吉亞凶多吉少
格魯吉亞上輪雖以4比0大炒直布羅陀，不過仍篤定以尾二完成分組賽，今場只係例行公事，作戰心態當然冇德國咁肉緊，何況陣中傷兵問題都幾嚴重，今仗隨時會畀多啲機會新人吸收經驗，佢哋歷來4次對德國全敗而且最少都輸兩球或以上，今屆外圍賽作客波蘭亦吞咗4蛋，今晚造訪德國難逃被炒命運。考慮到德軍剛戰失利後會知恥近乎勇，開波即搶攻，若嫌讓球主勝冇肉食，可以考慮1.92倍半場大盤。