飛腳全力捉天鵝

日聯盃4強次回合今午上演，首回合輸1比2嘅大阪飛腳，返到主場迎戰新潟天鵝。飛腳上仗作客雖然輸波，但多名主將都冇上陣，明顯係留力返主場先搏殺。相反天鵝雖然贏波，但有巴西中場里奧施華上仗領紅牌要停賽，實力受損下就算領先1球都唔係太有優勢，阿謙睇好揸住一個作客入球嘅飛腳可以贏波，飛腳小讓平半捧上盤。

（有線61及201台周日下午1時直播）

飛腳近3場輸晒表現似乎大跌Watt，但要留意呢3場都係作客，客戰唔算係佢哋嘅強項，所以輸波唔算太意外。飛腳有前鋒宇佐美貴史、中場米倉恒貴、後衞丹羽大輝同門將東口順昭分別被日本國家隊徵召繼續缺陣，後衞金正也因為喺上仗領紅牌要坐波監，今仗同樣無法上陣。不過，飛腳射手安達臣柏德列、隊長遠藤保仁同中場今野泰幸同樣喺上仗作客天鵝時休息冇上陣，今仗應該會重返正選陣容，加上球隊近5次主場出擊錄得4勝1和，今仗有望擊敗對手。

天鵝傷停戰力受損
天鵝上仗憑中場山本康裕同後備上陣嘅巴西前鋒拿費爾達施華各建一功，以2比1險勝飛腳取得領先優勢。不過，巴西中場里奧施華因為喺首回合領紅牌被罰停賽，今仗無法上陣，加上中場小泉慶未好番，後衞般奴哥迪斯及林裕煥有傷上陣成疑，對球隊實力始終有所影響。天鵝今仗作客飛腳相信都係凶多吉少，阿謙睇好飛腳可以喺主場贏番次，小讓平半捧上盤。