今晚除咗國際賽外，仲有兩場英乙聯賽，諾士郡主場對普利茅夫最有睇頭。諾士郡6年前曾經聘請瑞典名帥艾歷臣擔任總監，之後又搵嚟前英格蘭國腳恩斯執教，但「名牌泡沫」好快爆發，兩位猛人先後離開，球隊成績亦一路冇起色。諾士郡今仗更缺少兩位防線主力，邊抵擋得住前列強隊普利茅夫，平手盤捧普利茅夫穩陣。

（TVB 301周日晚9時30分直播）

諾士郡上仗英錦賽1比5慘敗於錫菲聯腳下，仲有後衞希頓賀利攞紅牌，今場需要停賽，隊長門將卡路爾為北愛爾蘭出戰歐國盃外圍賽仍未歸隊。冇咗呢兩位防線支柱，情況危危乎。至於普利茅夫愈戰愈勇，未計昨晚其他賽果，球隊高居榜首，成為爭升班熱門。中場格拉咸卡利大勇，今季聯賽已入咗5球，仲當選英乙8同9月嘅最佳球員，兩位後衞加利梳耶、卡麥曉治可以復出，人腳齊整，有力全取3分。

舒寧咸教衰史提芬納治
另一場英乙直播，埃克塞特主場對史提芬納治，史提芬納治雖然由英格蘭名將舒寧咸執教，但成績非常不濟，近5場比賽全敗，再次證明踢波叻教波未必掂。埃克塞特近4次主場贏3場，可以睇高一線。

（TVB 301周日晚7時15分直播）

最後葡聯盃第2圈，華森主場對阿洛卡，葡超阿洛卡近況麻麻，近5仗只有4和1負，但今仗遇上甲組球隊華森，正好趁機爭勝反彈，博客W。