歐國盃決賽周東道主法國今晚將作客丹麥進行熱身賽，法國上仗大勝阿美尼亞4比0，不過正選前鋒賓施馬受傷離場，預計領隊迪甘斯都唔想主力再有咩閃失，今仗會避重就輕畀派副選落場，丹麥完成歐國外後亦無心戀戰，今場首選細盤。

（有線61及201台周一凌晨2時45分直播）

法國近3仗熱身賽3連勝，先後擊敗葡萄牙、塞爾維亞及阿美尼亞，表現唔錯，可惜上仗梅開二度嘅皇馬前鋒賓施馬勇戰受傷，加上中場靈魂保羅普巴上場賽前已經因傷退隊，提早返意大利，缺少呢兩名中前場主力，對法國嘅進攻肯定有影響。主帥迪甘斯唔想傷兵問題加劇，今仗好大機會收起基沙文及馬度迪等常規正選，改派基奧特、安東尼馬迪爾、舒尼達連上陣，順便觀察埋呢批後備兵。

丹麥近期少交收
丹麥上周五凌晨0比1作客輸畀葡萄牙後，已經完成所有歐國外賽事，可唔可以憑次名身份直接出線決賽周，就要睇埋今晚早少少開波嘅阿爾巴尼亞會唔會失分。丹麥對上3場歐國外都冇入波，不過當中亦有兩場冇失波，今場捧細盤啱數。