爭踢附加賽唔贏唔得
荷蘭係生係死，未來兩輪歐國盃外圍賽係關鍵，力爭小組第3嘅「橙衣兵團」今晚喺A組造訪哈薩克，稍有差池隨時同2016年歐國盃決賽周講拜拜，你話今鋪點會唔搏？適逢尹佩斯將會第100次為荷蘭國家隊披甲，呢位「百戰射手」為證明自己仲係頂級鋒將，今晚肯定射爆魚腩哈薩克，1.7倍「讓球客勝」放心捧。

（有線61及201周日凌晨0:00直播）

A組形勢好簡單，兩個直接出線席位已經畀冰島同捷克攞咗，落後「三哥」土耳其兩分嘅荷蘭，家陣嘅目標係過對方頭爭踢附加賽，所以未來兩場外圍賽鬥哈薩克同捷克不容有失之餘，仲要望土耳其失分，形勢相當被動，不過嚟到呢個Moment唔理得咁多，最重要係做好本分，首要任務係斬殺哈薩克！

尹佬批死土耳其失分
翼鋒洛賓因傷冇份入選，右閘真馬特、攻擊中場卡拉臣同新星昆斯普美斯都先後受傷退隊，不過唔打緊，區區一隊哈薩克，尹佩斯同史奈達兩位「30+」夠照啦！當中今季轉投費倫巴治嘅「尹佬」尹佩斯，將會第100次喺國際賽披甲，呢位「左腳王」話好感激領隊白蘭特繼續信任佢，又話睇死土耳其嚟緊兩場波會失分，似乎對後上出線胸有成竹。

哈薩克場均失兩粒
「尹佬」咁淡定又唔係冇道理嘅，畢竟今晚對手哈薩克喺A組仲未開齋，平均每場失兩球咁多，家陣已經篤定出局，無欲無求鬥心自然唔夠荷蘭嚟。況且呢班波最踢得嗰件，已經係効力恩高斯達特嘅中場安基爾，實力去到邊大家心中有數，荷蘭要贏鑊勁冇乜難度。