歐國外今晚重燃戰火，並且去到轉彎入直路，三大超級殺手C朗、湯馬士梅拿同羅拔利雲度夫斯基（羅拔仔），均要為葡萄牙、德國及波蘭爭出線作最後衝刺，近期着晒火嘅佢哋能否再做英雄，一腳將國家送入決賽周呢？

葡國玩保守 C朗半場勒住踢
I組榜首大戰，由一哥葡萄牙於主場硬撼次席丹麥。雖然葡萄牙前線有皇馬萬人迷C朗領軍，但主帥費蘭度山度士嘅戰術部署極度保守，總係穩陣行先而常開半場和，撞正「Lord賓」賓特拿啞火嘅丹麥，初段處於膠着唔奇，半場和值得追多鋪。

（有線64及203台周五凌晨2時45分直播）

成日都話葡萄牙係一人球隊，並唔係特登踩拿尼、哥利斯馬、摩天奴唔掂，而係隊長C朗嘅能力確係超出幾條街，歷任主帥都非常倚賴呢位超級球星，但話分兩頭，C朗實在目標太大，勢必成為敵方後衞眾矢之的，葡軍進攻便陷於癱瘓，所以經常慨嘆「成也C朗、敗也C朗」。點樣先可將C朗發揮到極致呢？主帥費蘭度山度士就堅決打穩守突擊。

近9次出擊7戰開「半和」
費蘭度山度士之前執教以防守見稱嘅希臘，接連殺入2012年歐國盃及2014年世盃決賽周，佢亦將呢招成功「移植」入葡萄牙，重用般奴艾維斯、卡維奴、荷西方迪、艾利素、堤亞高文迪斯等「三張嘢」嘅中後場球員，利用佢哋嘅經驗打造穩健防守體系，然後再靠C朗、拿尼、哥利斯馬嘅速度及個人能力爭取入波。睇番佢帶領葡軍打咗9場波，7場勝仗都係「煲魚生粥」贏1粒，而初段踢得分外小心，當中有7仗開出半場和。由於葡軍今仗打和會肯定獲頭兩名直入決賽周，踢得保守啲唔奇。

丹麥「Lord賓」啞火
查實次席嘅丹麥只領先阿爾巴尼亞1分，仲要打多1場，如果今仗贏唔到，而阿爾巴尼亞擊敗塞爾維亞的話，便會失落頭兩名直接出線資格，形勢上要焗攻。可惜，佢哋嘅箭頭賓特拿於禾夫斯堡後備席雪到硬晒，好多球迷常用「Lord賓」嘲笑呢位自信帝，不過睇番依家丹麥陣中，只有佢同老將中堅丹尼爾艾格嘅入球達雙位數，可想而知丹麥堅靠「Lord賓」數胡，之前兩仗同阿爾巴尼亞及阿美尼亞互交白卷有辦你睇。睇嚟丹麥都係有心無力，疊埋心水打附加賽，今仗隨時又係C朗一箭定江山助葡萄牙小勝提早出線，但主W得1.53倍太乏味，既然葡軍初段咁保守，轉捧有2.05倍嘅半場和。