世盃外圍賽戰火重燃，國足今晚造訪卡塔爾演C組榜首戰。卡塔爾家陣熱到爆，比賽期間隨時高達攝氏40度，加上歸化兵射手蘇尼亞近期亦都夠晒Hot，睇怕國足都未必頂得順，一於捧2.2倍主W。

（TVB13、廣東體育及中央5台周四晚11:30直播）

主隊重召「卡塔爾馬納當拿」
卡塔爾分組賽3戰全勝高踞C組榜首，領先次席嘅國足2分，今場榜首戰佢哋鬼咁重視，唔單止學似中國咁設計賽事Poster，更重召傷愈嘅前亞洲足球先生卡芬伊巴謙入伍，呢位有「卡塔爾馬納當拿」之稱嘅好波之人，最叻鋪橋搭路，有佢為新季卡塔爾聯賽4戰入3球嘅烏拉圭歸化兵蘇尼亞提供彈藥，卡塔爾主場出擊夠晒得人驚。

國足杜拜集訓頂唔順
國足特登提早去咗杜拜集訓，盡快適應西亞炎熱天氣，仲搵咗當地1間中菜館安排午餐同晚餐，以免一眾國腳食唔慣。據悉，卡塔爾夜晚仲熱過中午嘅廣州，國足成員今次喺同卡塔爾差唔多熱嘅杜拜集訓期間，明顯唔太頂得順，日日要喪飲綠豆水同狂食龜苓膏消暑，今晚落到場能唔能夠克服炎熱天氣真係一大疑問。雖然隊長鄭智以及一對守將任航、吉翔已經復操，但狀態去到邊冇人知，左閘鄒正就因傷好大機會缺陣，點睇都唔似會頂得住卡塔爾進襲。