前線乏人 鄧加求穩陣
南美洲區世盃外圍賽正式展開，新鮮出爐嘅美洲國家盃冠軍智利，首戰將會喺主場迎戰傳統勁旅巴西！「森巴軍團」向來食住智利，何況自從主帥鄧加上任後，球隊大幅度提升防守力，就算呢次人腳不整下惡鬥智利，亦未必輸蝕好多，1.75倍入球細咪走寶。

（開賽時間：周五早上7:30）

「森巴軍團」自從喺上年世盃慘敗畀德國後，一直刻意加強防守，避免再一次傷透國民心情。巴西喺世盃之後一共踢咗16場比賽，當中9仗零封對手，而且每場波亦未試過失守1次以上，可見鄧加改造成效理想。

事實上，巴西近年頂級進攻人腳選擇唔多，呢鋪冇埋主力射手尼馬、中場菲臘比古天奴幫手，就算補入已過巔峰嘅卡卡，亦無條件同智利鬥攻。好在佢哋中場勝在夠爛打，中場路爾斯古斯達禾同費蘭甸奴勤於掃蕩，奧斯卡杜斯山度士同韋利安喺莫連奴教導下，變得攻守兼備，若然巴西一心以守為先，相信智利都未必咁易咬得入。

智利往績輸條街
何況智利近年對住巴西戰績一面倒輸蝕，近10次交手錄得2和8負不勝戰績。即使佢哋已經打起咗阿歷斯山齊士、維達爾等球星，但最近2鋪對巴西依然贏唔到，夾埋入得1粒咁大把。考慮埋雙方都唔想首戰失利打擊士氣，怕且兩軍進攻節奏亦唔快得去邊，咁嘅情況都係捧細盤穩陣。