背負國民希望，為梅拿打氣！
歐國盃D組今晚上演關鍵大戰，愛爾蘭喺主場硬撼德國。雖然愛爾蘭形勢上係唔輸得，但德國仲未穩奪出線資格，主帥勒夫更加講明，絕對唔會輕視任何對手，加上德國上星期先慶祝完統一嘅25周年紀念，為出線、為面子，呢鋪當然唔衰得，德國讓1球，照捧1.78倍上盤！

（有線61及201、中央5台周五凌晨2:45直播）

現時「1哥」德國只不過領先同組嘅波蘭2分，同時以4分放甩愛爾蘭，假如今場失分的話，出線形勢就會變得好混亂，所以德國主帥勒夫，賽前已提醒佢班手足，千祈咪以為愛爾蘭好容易對付，話明搏盡攞足3分。

係，雖然「日耳曼兵團」有前鋒普多斯基因傷退隊、中場馬高列奧斯又未傷愈，但普多斯基已經再唔係以前嘅「王子」，馬高列奧斯今季喺多蒙特嘅風頭又畀奧巴美揚搶晒，重要性大不如前，呢兩位仁兄退隊，相信都唔會影響德國嘅實力同贏波決心。

梅拿患腦退化症 T梅用士哥撐偶像
仲有，上星期嘅10月3號，其實係德國統一嘅25周年紀念日，咁大日子，相信德國班球星唔會希望喺都柏林出事，否則都幾難同班國民交代。再講，德國一代傳奇、「轟炸機」梅拿證實患上腦退化症，佢係唔少德國球員嘅偶像，尤其係「新轟炸機」、「T梅」湯馬士梅拿，更加當佢係神咁拜，作為後輩，呢場波當然要入多幾粒，向前輩作出支持同敬意啦！

史密斯高文有傷 愛爾蘭防守力打折
冇錯，主場嘅愛爾蘭原本都幾硬淨，可惜佢哋唔止有中場格連韋倫停賽，防線超級主力史密斯高文，仲因為有傷9成缺陣，咁嘅情況，遇到決心極大嘅德國認真唔好彩。更何況，最近愛爾蘭重新重用39歲門將基雲，佢經驗的確係夠，不過反應唔快，對住德國嘅瘋狂轟炸，恐怕好難守到底，所以話熱捧德國，點睇都係穩陣啲囉！