高溫境界 體力消耗快
世盃外亞洲區第2圈C組榜首大戰，卡塔爾主場對中國，國足目前落後對手2分，理應採取主動搶分，只是礙於當地天氣炎熱，相信中國上半場唔會搏得太盡，以免體力太快消耗導致後勁不繼。卡塔爾積分上有優勢，亦毋須太過急於求勝，可睇定來踢，預料上半場戰情膠着居多，換邊後先至真正埋牙搏槌，一於捧半場和。
（TVB 13周四晚11時30分直播）
主力疲憊唔敢冒進
卡塔爾以天氣酷熱聞名，現時日間氣溫高達攝氏40度，即使傍晚亦有35度，搞到2022年卡塔爾世界盃都要安排喺冬天舉行。中國當然知道今場最大敵人係氣溫，早前已拉隊飛去阿聯酋杜拜集訓，希望適應中東濕熱天氣。據悉球員操完一課後體重即下降6磅，個別球員更出現嚴重脫水，球隊甚至禁止國腳們日間出外活動或游水，以免浪費體力。
國足以鄭智、張琳芃等廣州恒大球員為骨幹，近期又要分身踢亞冠盃而疲於奔命，今場非常考驗中國球員如何留放體力。最正路係留前鬥後，上半場以拉布踢法節省體力，下半場再出全力，希望將對手一劍封喉。事實上，對賽往績中國處於下風，近3次對卡塔爾錄得1和2負，而且都入唔到波，而近4次作客卡塔爾亦得3和1負，估計中國隊唔敢冒進，希望作客攞到1分，已經於願足矣！
卡塔爾和波都冇壞
至於卡塔爾以國內球隊利卡維耶球員為骨幹，整體實力唔會高得過中國太多，佢哋領先中國2分，就算今場打和亦冇壞，最緊要唔好輸就可以繼續佔據榜首，出線形勢自然樂觀。估計卡塔爾會慢慢搓住踢，等中國推前時再打突擊，故今場入波唔慌多，半場和同入球細可雙投。
