阿根廷主場迎戰厄瓜多爾，雖有美斯、希古恩同馬高斯盧祖因傷唔踢得，但「潘帕斯雄鷹」仍有唔少星級球員在陣，加上前線主力阿古路近期入波頻頻，面對實力一般嘅厄瓜多爾相信會攞到唔少入波，阿謙推介大盤。

（周五早上8時開賽，馬會網上文字直播）

阿古路「五福臨門」入唔停
阿根廷今年未能贏得美洲國家盃冠軍，令球迷非常失望，但主帥馬天奴繼續得到信任。「潘帕斯雄鷹」上月喺美國踢咗兩場熱身賽，先以7比0大炒玻利維亞，其後與墨西哥踢成2比2。其中美斯喺大勝玻利維亞一仗只係後備上陣，但球隊喺佢上場前已經遙遙領先4比0，所以今仗美斯唔踢得對阿根廷嚟講未必係壞事。阿根廷今仗應會倚重阿古路、泰維斯同拿維斯攻堅，其中曼城鋒霸阿古路剛喺英超射入5球腳風甚順，配合近況同樣唔錯嘅泰維斯同拿維斯，連番攻破厄瓜多爾大門並非難事。

厄瓜多爾喺今夏美洲國家盃分組賽出局，上月同洪都拉斯「拍跳」雖贏2比0，但對手實力與今仗對手阿根廷相距甚遠，所以參考性極低。由於韋斯咸前鋒安拿華倫西亞因傷落選，前線只餘西甲愛斯賓奴前鋒卡些度較具威脅，至於踢緊曼聯嘅中場路爾斯華倫西亞今季狀態麻麻，單靠史雲斯翼鋒謝法臣蒙迪路相信難以構成威脅，作客面對「潘帕斯雄鷹」相信都係等做炮灰，入球大有1.72倍捧得過。