首輪失「星」 提防爆冷
世界盃外圍賽南美洲區賽事展開，首輪比賽失「星」，阿根廷球王美斯、巴西紅人尼馬、哥倫比亞王子占士洛迪古斯、烏拉圭孖寶蘇亞雷斯同卡雲尼，分別因傷或停賽缺陣！球迷冇得追星之餘，所屬國家隊失去主力之下，會否出閘脫腳令人關注，提防爆冷！

尼馬喺6月美洲國家盃動粗，被重罰停賽4場，「森巴兵團」近年愈來愈依賴尼馬，其他進攻球員難當大任，今趟作客美洲盃冠軍智利，情況難樂觀。智利射手阿歷斯山齊士為阿仙奴近3仗轟入6球，銳不可當，足以射爆巴西大門，直取主W。

（周五早上7時30分開賽，馬會網上文字直播）

侯克搭奧利華拉唔開胃
近年巴西鋒線，除咗尼馬之外，其他人選多屬平庸之輩，令領隊鄧加揀唔落手，6月美洲盃期間，甚至要中場羅拔圖法明奴客串前鋒，今輪羅拔圖法明奴同另一位利物浦猛將菲臘比古天奴都因傷落選。鄧加只有選入「變形俠醫」侯克同35歲老將奧利華拉兩個前鋒，真係睇見都唔開胃，日前焗住補選33歲中場卡卡救亡，實在係「森巴足球」嘅悲哀。防線主力堤亞高施華亦缺陣，靠「計時炸彈」大衞雷斯鎮守後防，今鋪真係有得震，冇得瞓。

至於智利，近年人才輩出，成績突飛猛進，今年捧走美洲國家盃冠軍，顯示級數已達南美一線。阿歷斯山齊士狀態弗到漏，上仗英超梅開二度，助阿仙奴大炒曼聯3蛋，加上中場全能戰士維達爾，話智利現時人腳比巴西更強大，絕對唔誇張，配合地利，全取3分好合理。