澳職周四正式開鑼，打頭陣嘅係西悉尼流浪者主場對布里斯班獅吼。流浪者上季聯賽排第9表現令人失望，今季銳意擴軍希望重振聲威。不過，佢哋上季經常喺領先後「衰收尾」，今仗對住人腳冇咩變動嘅獅吼，隨時又再出現呢個情況，一於喺西悉尼流浪者入波先之下，追獅吼下一隊入球。

（有線64及203周四下午5時直播）

流浪者慣性「虎頭蛇尾」
西悉尼流浪者上季只能以第9名完成球季，所以今季進行大換血，陣中多達18名球員離隊，同時網羅咗10名球員返嚟，相信佢哋都要時間磨合。流浪者上季喺領先下經常未能保持勝果，喺聯賽10次先開紀錄，竟然有8次畀對手追和甚至反勝，只有1次可以贏到尾。

上月舉行嘅澳足盃8強戰，流浪者喺半場領先下未能維持勝局，結果畀珀斯光輝追和再喺互射12碼階段被淘汰，今仗對獅吼就算入波先，都唔可以咁「老定」。

獅吼上季以第6名過終點並趕上季後賽尾班車，可惜首戰就輸畀阿德萊德聯被淘汰。新一季球隊人腳變動唔大，今季成績估計會同上季相若。獅吼上季喺聯賽有12次先失波，當中有9次都未能平反敗局，但喺呢12場波入面，獅吼有5次都喺失波後成功扳平，可見球隊有一定入球能力，今仗面對「虎頭蛇尾」嘅西悉尼流浪者，可以喺對手入波後押注獅吼下一隊入球。