今期最紅唔使講肯定係波蘭射手「羅拔仔」羅拔利雲度夫斯基，風頭蓋過晒兩大球王美斯同C朗呀，喺球會拜仁慕尼黑4場一共轟入12球，狀態勇得恐怖，咁啱呢個時候有歐國盃外圍賽，真係天助波蘭出線決賽周囉！身處D組嘅波蘭今場將會作客蘇格蘭，有「羅拔仔」孭飛，波蘭要贏唔難，平手盤一於要波蘭！

（有線62及202台周五凌晨2時45分直播）

波蘭喺歐國外最後兩仗分別會作客蘇格蘭同主場迎戰愛爾蘭，今場對住實力較弱嘅蘇格蘭係搶分關鍵戰役，波蘭依家喺D組排緊第2，今場只要擊敗對方全取3分，就出線在望。咁啱波蘭隊長羅拔利雲度夫斯基呢排腳風順到爆，先喺拜仁對禾夫斯堡喺9分鐘內射入5球，一夜爆紅，跟住3仗場場都入2至3球，真係弗到勒都勒唔住。

蘇格蘭輸波即出局壓力大
蘇格蘭助教麥基爾就話，佢哋唔會驚羅拔仔喎：「我哋唔會特別招呼佢，佢啲確好弗，不過我哋陣中都有托弗球員，好似利治格菲斯、史提芬費查、基斯馬田等都有喺上周球會賽事有入波。」將羅拔仔攞嚟同史提芬費查呢啲三流前鋒比，真係侮辱晒羅拔仔呀！蘇格蘭今場一輸即出局，球員壓力極大，更難發揮平時水準，而且條防線對住咁癲嘅「羅拔仔」，唔驚就假，唔係麥基爾得把口咁，話唔驚就唔驚囉，今場一於捧波蘭！