Ｄ組重頭戲愛爾蘭主場迎戰德國，雖然話德國和波已篤定出線，不過佢哋對去年10月喺主場畀愛爾蘭摸和仍然耿耿於懷，教頭勒夫講明要全取3分慶祝，面對殘陣嘅愛爾蘭勝望甚高，客Ｗ熱到1.35倍冇肉食，考慮到德軍擁有湯馬士梅拿呢位「當紅急先鋒」，預期上半場已經可以取得領先優勢，推介1.8倍半場客勝。

（有線61及201台周五凌晨2時45分直播）

愛爾蘭6撼德國未威過
愛爾蘭作客和過德國，至今喺Ｄ組4場主場賽事保持不敗，而且目前位列第3，想出線當然要搏命，不過佢哋過去喺正式賽事6次對德國3和3負未贏過，而且仲有嚟緊下周一凌晨作客對次席波蘭嘅關鍵大戰，目前陣中傷停問題都幾嚴重，除咗兩位中場西布朗占士麥堅恩同史篤城格連韋倫要停賽外，守將愛華頓史密斯高文同打比郡施路斯基士堤因傷缺陣，另外仲有4位中後場主力如果再攞黃牌，下場就要停賽，有後顧之憂。

德國自去年10月失分畀愛爾蘭後，喺歐國盃5戰全勝重返榜首，陣中最火熱球星當然係湯馬士梅拿，呢位射手喺德甲同歐國盃外圍賽都各有8個入球，而且經常上半場就嚟料，歐國盃8個入球有7個喺上半場取得，包括近3仗共入4球，佢啱啱為拜仁喺德甲對多蒙特亦晨早包辦頭兩個入球，今晚去到都柏林可望繼續做急先鋒！