各有目標鬥攻格局
美職嚟到最後階段，各隊為咗唔同嘅目標作最後衝刺。紐約紅牛為保住東岸同常規賽冠軍名銜，餘下每場賽事都要搏盡，今場對手蒙特利爾衝擊正為出線季後賽而掙扎，兩隊都有明確目標，勢必主動搶攻爭勝，相信半場已經會出現唔少入球，阿謙推介半場大。
（TVB 301周四早上7時30分直播）
美職常規賽進入直路階段，東西岸首六名皆可踢季後賽，一眾處於出線邊緣嘅球隊近期開始發力，希望趕上尾班車，衝擊就係其中一支處於呢個情況嘅球隊。衝擊自37歲射手杜奧巴加盟後，表現持續上升，近七仗錄得四勝二和一負唔錯成績，輸波一仗正係上場作客不敵奧蘭多城，杜奧巴由於畀球隊限制出場時間，所以嗰場波只係後備上陣。
杜奧巴落場 入波有保證
衝擊今仗雖有甘馬倫樸達、堅尼谷巴同艾歷米拿因傷缺陣，但球隊仍有奧杜奴、比亞迪同李奧曲卡等在陣中，加上喺美職打橫行嘅杜奧巴今仗應會獲得更多上陣時間，相信有力喺對手身上入到波。
目前排喺常規賽及東岸第一嘅紅牛近況雖然反覆，但球隊為咗保住常規賽同東岸冠軍個位，餘下四輪聯賽相信都唔會錫力。事實上紅牛近期經常喺上半場就同對手「駁火」，對上七場波竟全數開出半場大，可見已進入「有前冇後Mode」。紅牛前鋒巴利胡禮菲臘斯、中場萊特森同基捷斯坦近期頻頻有波入，今仗雖有基斯杜華爾、萊爾米拿、安拿度利艾班因傷缺陣，但以球隊嘅火力相信半場就可以同衝擊上演入球騷，阿謙捧半場大。
