德乙未開齋 9場失23粒
今晚德乙獨腳戲「海軍鬥水兵」，兩支榜下游球隊杜伊斯堡同柏達邦將會正面交鋒。柏達邦係曳，但呢隊波近況衰唔晒，對住仲未開齋嘅杜伊斯堡唔搶分等幾時？柏達邦讓平半捧上盤。

（開賽時間：周二凌晨2:15）

柏達邦逼和強隊振士氣
柏達邦家陣比包艇嘅杜伊斯堡多5分，你話佢叻人哋好多咩？又唔係，但起碼叫做有啲戰鬥力。呢班波近3仗錄勝和負各1戰績，上輪聯賽對住前列分子聖保利成功逼和搶到1分，對士氣同信心無疑有極大鼓舞。加上陣中除咗前鋒拿傑要坐波監之外，其餘主力都可以披甲，人腳算係幾齊整。

相反杜伊斯堡就死氣沉沉，新季德乙仲未開齋，9輪聯賽過後足足失咗冠絕聯盟嘅23球，最大劑係中場艾爾巴特繼續停賽，中堅邦希亞仲因為撞爆鼻骨加入十字軍行列，如今呢班波起碼有5件主力養緊傷。近況差、防守曳之餘，傷兵名單仲水蛇春咁長，今鋪無謂作對，撐柏達邦踩多腳全取3分。