易帥回勇 打出團火
周末德甲重頭戲兩支歐聯球隊互撼，慕遜加柏同「狼堡」禾夫斯堡疲兵對決，相比之下慕遜加柏換帥後演出更為討好，在頻密賽程下連續主場出擊，體能方面明顯比接連作客嘅「狼堡」佔優，平手盤捧主隊慕遜加柏。
（now 670、有線61及201台周六晚9時30分直播）
慕遜加柏經過災難開局及換帥後，明顯大有起色，於新帥舒伯特領軍下，聯賽連接大炒奧格斯堡及史特加，球隊上下有番團火。鋒將拉菲爾基達奴同新援史甸度喺前線表現特別活躍，攻擊靈魂人物靴爾文亦傷愈復出，剛周中歐聯對曼城，雖於領先下由贏變輸，但陣上表現其實十分出色，可惜時運不濟，先有拉菲爾基達奴主射12碼被赫特救出，繼有客軍奧達文迪禁區內犯手球冇判12碼，然後守將安達斯基斯甸臣自擺烏龍，去到完場前仲有法比安莊臣侵犯阿古路被判極刑，最終慘遭絕殺。
另一邊廂，禾夫斯堡今季賣走奇雲迪布尼之後，確需要時間適應，而且球隊陣中表現火氣平平，未能給予對手更多壓迫感，尤其作客表現更差，聯賽同歐聯作客未贏過，德甲面對弱旅科隆同恩高斯達特都贏唔到，作客鬥拜仁更慘敗而回，啱啱歐聯對曼聯亦畀對手反敗為勝。
禾夫斯堡歐聯未回氣
何況慕遜加柏歐聯同今仗都喺主場踢，免去舟車勞頓之苦，比起啱啱遠征奧脫福後，又要作客嚟保路西亞公園嘅「狼堡」佔盡便宜，加上慕遜加柏近五主場對禾堡取得三勝兩和佳績，平手盤撐主隊。
