智利好默契踢走乌拉圭

美洲盃8强开战！

有玩过《FIFA》足球游戏嘅球迷，对「球员默契度」应该唔会陌生，但如果将呢项设定套用喺今届美洲国家盃主办国智利之上，相信象徵默契度最高嘅绿色，亦未必足以表达到佢哋有几咁夹！想知智利班波到底有几掂？佢哋听朝喺8强迎战乌拉圭，一于捧1.67倍主胜，担定櫈仔睇表演啦！ （now681台周四早上7:30直播）

智利近3次跻身美洲盃8强都冇好下场，分别不敌墨西哥、巴西同埋委内瑞拉出局。但相比睇往绩，笔者更重视近况，喺分组赛阶段斩获10球嘅智利，即使撇除玻利维亚嗰球乌龙波，埋单9球亦多过巴西同阿根廷两大南美劲旅喺小组赛嘅入球总和，强大火力令人闻风丧胆！

智利多1日休息备战

智利锋力咁勐，全因一众球星「默契度」爆灯，3场分组赛除咗中场司令塔阿历斯山齐士入波外，维达尔同伊度亚度华加斯等几名中前场勐将，更係入波助攻瓣瓣有，进攻得分点多到咁，乌拉圭班后衞真係防不胜防！

再讲，智利本来较乌拉圭多1日时间休息同备战，佢哋最后嗰轮分组赛斗玻利维亚，领队森柏奥利仲早喺下半场一开波就换走维达尔同阿历斯山齐士，今场喺体能方面会佔有一定优势。森帅赛前话到明，即使嚟到淘汰赛亦唔会改变主攻踢法，仲使怕冇波入咩？

乌拉圭冇前锋识入波

另边厢，乌拉圭今届美洲盃表现唔对办，分组赛平均传球成功率掹车边得7成，唔单止同智利（85.23%）差一大截，佢哋仲冇个前锋识入波，卡云尼、迪亚高洛兰同艾保靴南迪斯喺今届美洲盃都未开斋，加上智利喺赛前作针对性部署，苦练防守头槌阻止高甸同荷西基文尼斯两条大杉靠头槌搵食，乌拉圭今场要撕破智利防线唔係易事。

仲有，今届场场踢足嘅左闸艾华路佩雷拉，因为黄牌够数要坐波监，乌拉圭领队泰巴尼斯无论搵司职右闸嘅富斯尼做「替工」，定派国家队新丁加斯顿施华落场，防守力都难免打折，点顶得住智利嘅狂轰勐炸呀？