「過五關」第1擊！
今日展開「過五關」之旅嘅廣州恒大淘寶（足智彩譯FC廣州），喺亞冠盃4強首回合主場迎戰日職豪門大阪飛腳，以佢哋勁爆亞洲嘅陣容嚟講，贏波問題唔大，只係擔心後防有失波炒唔起啫，呢種環境玩恒大讓半一個1.73倍上盤比較穩陣。
（now670台周三晚8:00直播）
恒大要兼顧亞冠、中超兩條戰線，確實幾辛苦吓，尤其由今日開始嘅1個月內，佢哋要兩戰飛腳，聯賽又要連撼天津、山東、北京3支強隊，5場都係硬仗，只要其中一關甩轆，殺入亞冠決賽或者中超5連霸嘅夢想都可能破滅，真係壓力奇大。
但係勝在資金雄厚嘅恒大，超級球員多，連前巴西國腳羅賓奴都只係踢中超，有充裕兵源應付兩面作戰，所以今日一定會毫無保留咁狂攻飛腳，希望炒爆對手，打穩晉級基礎，然後將多啲精神放番响聯賽爭霸。
大阪飛腳踢守勢波
不過，恒大並唔係全無弱點，近兩場中超佢哋幾乎畀富力、貴州逼和，場場有失波，全靠完場前秒殺先至兩連勝，平咗球隊响2011球季創造嘅23輪不敗紀錄，能唔能夠向飛腳派蛋真係幾成疑問。況且飛腳主帥長谷川健太都承認，佢哋先作客後主場係種優勢，只要呢場玩穩守突擊，守得和或者攞到作客入球，就有機會複製8強淘汰全北汽車嘅成功，可以預見飛腳一定會採取守勢，博恒大炒起佢哋有啲冒險，都係博個熱咗些少嘅上盤划算。
