祖記天殘地缺點發「維」？

意甲班霸祖雲達斯今季迎嚟最差開季，主要與陣中太多主力受傷有關，今晚歐聯D組主場迎戰西甲球隊西維爾仲要讓一球，就真係唔多信得過，西維爾1.85倍「讓球客勝」值得一試。

（有線62及202、中央5台周四凌晨2:45直播）

文迪蘇傑難鬥西維爾
「斑馬兵團」今季冇晒霸氣，竟喺意甲榜下游徘徊，僅排15位，真係季前講都冇人信。祖記沉淪，主因係陣中主力十字軍太多。雖然佢哋有西班牙型仔射手艾華路莫拉達傷愈復出，但另一箭頭文迪蘇傑仲未好番，加上中場又有馬治斯奧、基迪拉同右閘列治史迪拿繼續要接受傷勢治理，令到已經有派路同維達爾離隊嘅陣容更加天殘地缺。

另邊廂嘅西維爾其實都唔好得好多，同樣受到傷病問題困擾，搞到佢哋喺西甲只係排16位。唯一慶幸係西維爾上場終喺聯賽開齋，士氣點都好過上輪意甲又輸一場嘅「斑馬兵團」。雖然話今場作客，但西維爾要頂住同樣頹爆嘅祖雲達斯搶1分應該唔難，「讓客」絕對有得諗。