亞冠盃4強首回合中日大戰，中國豪門ＦＣ廣州（廣州恒大淘寶）主場迎戰日職大阪飛腳！恒大堪稱「東洋剋星」，過去4次亞冠盃淘汰賽遇上日本球隊，都可以晉級。加上大阪飛腳教練長谷川健太停賽，形勢更輸蝕。ＦＣ廣州讓半一，力撐上盤。

（now 670周三晚8時直播）

恒大公布今場海報，大大隻字寫住「破五關」，原來佢哋近4次亞冠盃淘汰賽，鬥日本兵團，例必晉級，包括今屆8強踢走柏雷素爾，今輪亦要過關。事實上，恒大狀態弗到震，近6場比賽贏5場，包括大炒聯賽爭標勁敵上海上港3比0，穩佔榜首之位。

每淨勝1球醒五百萬人仔
呢支「中國曼城」依家可全力爭奪亞冠盃錦標，首回合更加要把握主場之利，鞏固晉級基礎。而且球會老闆許家印講明，每淨勝1球就有500萬人民幣獎金，仲話上限為5,000萬，換言之希望球隊可以贏足10粒！

大阪飛腳8強次回合戲劇性淘汰全北汽車，但亦付出好大代價，當時比賽未結束，教練長谷川健太衝入場慶祝入波，被球證出示紅牌，今仗需要停賽。大戰過程往往瞬息萬變，長谷川健太唔可以喺場邊指揮大軍，肯定蝕底。陣中兩大進攻主力宇佐美貴史及安達臣柏德列近期都啞火，睇怕只能捱打。